លំនៅស្ថានមួយខ្នង ត្រូវបានបំផ្លាញដោយអគ្គិភ័យ

កំពត: ក្នុង​មួយប៉ប្រិចភ្នែក លំនៅស្ថាន​មួយ​ខ្នង ដែលមាន​ទំហំ​៥​ម៉ែត្រ​គុណ​នឹង​២០​ម៉ែត្រ ធ្វើ​ពី​ឈើ ដំបូល​និង​ជ​ញ្ញាំ​ង​ស័ង្កសី ត្រូវបាន​បំផ្លាញ​ដោយ​អគ្គិភ័យ កាលពី​ព្រឹក​ថ្ងៃទី​១៦ ខែកញ្ញា ឆ្នាំ​២០១៣​។ 

​ហេតុការណ៍​ដែល​ផ្តោត​ការសង្ស័យ បណ្តាលមកពី​ទុស្សេ​ខ្សែភ្លើង​នេះ កើតឡើង​ក្នុងភូមិ​ក្រាំង សង្កាត់​ក្រាំង​អម្ពិល ក្រុង​កំពត ខេត្តកំពត​។ មិនមាន​សមាជិក​ណា​ម្នាក់ រងរបួស​ទេ ទោះបី​ស្ត្រី​ជា​ម្ចាស់ផ្ទះ តក់ស្លុត យំ​ស្រែក រហូតដល់​សន្លប់​ក្តី​។ តុល្យការ​នៃ​ការខូចខាត មិនទាន់​ប៉ាន់ប្រមាណ​ដឹង​នៅឡើយ​ទេ​។ ម្ចាស់ផ្ទះ​រងគ្រោះ ឈ្មោះ គឹម ប្រុស អាយុ ៣៣​ឆ្នាំ ។​

​ម្តាយ​របស់​ម្ចាស់ផ្ទះ បាន​រៀបរាប់ថា មុនពេល​កើតហេតុ មិនមាន​មនុស្ស​ចាស់​នៅផ្ទះ​ទេ គឺ​មានតែ​ក្មេងៗ​។ ចំណែក​ចង្ក្រាន ក៏បាន​បង្កាត់ភ្លើង​ដែរ​។​

​តែ​អ្នកជិតខាង បាន​ប្រាប់ថា មុនពេល​មាន​អណ្តាតភ្លើង​ឆាបឆេះ​សន្ធោសន្ធៅ​នោះ គេ​ឮស្នូរ​សំឡេង​ផ្ទុះ​មួយ ដែល​អ្នកជិតខាង សង្ស័យថា អាច​ផ្ទុះ​ធុង ឬ​កំប៉ុង​ហ្គាស​។ ករណីនេះ​ស្ត្រី​ដដែល​បញ្ជាក់ថា ផ្ទះ​នេះ​មិនមាន​ប្រើ​ហ្គាស​ទេ ដូច្នេះ​គាត់​មិនដឹងថា បណ្តាលមកពី​អ្វី​ពិតប្រាកដ​ឡើយ​។​

​លោក អេង វណ្ណា នាយប៉ុស្តិ៍​នគរបាលរ​ដ្ឋ​បាល​សង្កាត់​ក្រាំង​អម្ពិល បាន​បញ្ជាក់ថា ហេតុការណ៍​នៃ​ការឆេះ​ផ្ទះ​នេះ បណ្តាលមកពី​ទុស្សេ​ខ្សែភ្លើង​។ លោកនាយ​ប៉ុស្តិ៍ បន្តថា ផ្ទះ​ទាំងមូល​ដែល​សង់​អំពី​ឈើ ដំបូល​និង​ជញ្ជាំង​សង្ក​សី បាន​ខូចខាត​ទាំងស្រុង តែ​ការខាតបង់​មិនទាន់​ប៉ាន់ប្រមាណ​ដឹង​នៅឡើយ​ទេ​៕ 

 - See more at: http://www.cen.com.kh/localnews/details_more/22?token=YmNhNjM4Y2#sthash.g6cKYlK0.dpuf