រកឃើញគ្រាប់បែកចាស់ ២ គ្រាប់ទៀតនៅមាត់ស្ទឹង ជិតស្នាក់ការគណបក្សសង្គ្រោះជាតិ​

សៀមរាប: សមត្ថកិច្ច​ជំនាញ​និយាយថា ពួកគេ​បានធ្វើការ​រាវរក​ហើយ​ប្រទះឃើញ​គ្រាប់បែក​កញ្ចាស់ ២ គ្រាប់​ទៀត គឺ ១ គ្រាប់​ស្ថិតនៅ មាត់​ស្ទឹង​សៀមរាប ត្រង់​ម្ដុំ​មុខ​ស្នាក់ការ​គណបក្ស​សង្គ្រោះ​ជាតិ និង ១ គ្រាប់​ទៀត​ស្ថិតនៅក្នុង​វត្ដ​កុង​ម៉ុ​ច​នៅ​ភូមិក​ក្រាញ់ សង្កាត់​សៀមរាប ក្រុង​សៀមរាប ខេត្ដ​សៀមរាប កាលពី​រសៀល​ថ្ងៃទី​១៥ ខែកញ្ញា ឆ្នាំ​២០១៣​នេះ​។ 

​    ​
​ការដែល​រកឃើញ​គ្រាប់បែក​កញ្ចាស់ ២ គ្រាប់​ខាងលើ ត្រូវបាន​សមត្ថកិច្ច​មា​ន មន្ដ្រី​ការិយាល័យ​ប្រឆាំង​អាវុធជាតិផ្ទុះ ជាតិពុល នៃ​ស្នងការដ្ឋាន​នគរបាល​ខេត្ដ​សៀមរាប អង្គភាព​កំចាត់មីន​ស៊ីម៉ាក និង​សមត្ថកិច្ច​មូលដ្ឋាន បាន​ទៅពិនិត្យ​ជាក់ស្ដែង ហើយ​នៅ​រសៀល​ថ្ងៃ​ដដែល គ្រាប់បែក ២ គ្រាប់​នេះ ត្រូវបាន​អង្គភាព​ស៊ីម៉ាក​ដកហូត​ទៅកាន់​អង្គភាព​របស់ខ្លួន​។ 
​    ​
​លោក​វរសេនីយ៍ទោ ឆេ​ត ញ៉ា ប្រធានការិយាល័យ​ប្រ​ឆាំ​អាវុធជាតិផ្ទុះ ជាតិពុល​ខេត្ដ​សៀមរាប បាន​និយាយ​ឱ្យដឹងថា គ្រាប់បែក​ខាងលើ គឺជា​គ្រាប់បែក​កញ្ចាស់​មួយ ផលិត​នៅ​សហរដ្ឋអាមេរិក ហើយ​គ្រាប់បែក​នេះ បាន​ច្រេះ​ស៊ី​ទាំងអស់ ត្រូវបាន រាវរក​ឃើញ​ដោយ​កម្លាំង​សមត្ថកិច្ច​ពាក់ព័ន្ធ​។ លោក​បន្ដថា គ្រាប់បែក​នេះ​ជា​គ្រាប់បែក​សំណល់​សល់​តាំងពី​សម័យ​ដែល​សហ រដ្ឋ​អាមេរិក​ទំលាក់​គ្រាប់បែក​នៅ​ស្រុក​ខ្មែរ​មកម្ល៉េះ​។ 
​    ​
​លោក ឆេ​ត ញ៉ា បន្ដទៀតថា គ្រាប់បែក​នេះ​ត្រូវបាន​ក្រុមហ៊ុន​កូរ៉េ​ធ្វើការ​ស្ដារ​ស្ទឹង​សៀមរាប នាពេល​កន្លង​ទៅហើយ កាយ​ចេញពី​បាត​ស្ទឹង​ដើម្បី​យក​អាចម៍ដី​មកចាក់​មាត់​ស្ទឹង មិនដឹងថា​មាន​គ្រាប់បែក​អ្វី​នោះទេ ប៉ុន្ដែ​នៅពេល​រាវរក​ទើប​រកឃើញ ថា​មាន​គ្រាប់បែក​កញ្ចាស់ ២ គ្រាប់​នេះ ដោយ ១ គ្រាប់​នៅ​មាត់​ស្ទឹង និង ១ គ្រាប់​ទៀត​នៅក្នុង​វត្ដ​កុង​ម៉ុ​ច​។​
​    ​
​កាលពី​វេលា​ម៉ោង​១១​ព្រឹក​ថ្ងៃទី​១២ ខែកញ្ញា​កន្លងទៅ នៅ​ចំណុច​ទីតាំង​ខាងលើ​ដដែល គេ​ប្រទះឃើញ​គ្រាប់បែក​ប្រ ភេទ​នេះ​មួយ​គ្រាប់​រួចមកហើយ ពេលដែល​គណបក្ស​សង្គ្រោះ​ជាតិ ជួបជុំ​សមាជិក​របស់ខ្លួន​មុខ​ស្នាក់ការ​គណបក្ស​សង្គ្រោះ​ជាតិ នៅ​ភូមិក​ក្រាញ់ សង្កាត់​សៀមរាប ក៏បាន​ប្រទះឃើញ​គ្រាប់បែក​មួយ​គ្រាប់​នេះ​ឡើង​។​
​    ​
​គ្រាប់បែក​ឃើញ​ថ្ងៃទី​១២​នោះ ត្រូវបាន​អង្គភាព​ស៊ីម៉ាក​ខេត្ដ​សៀមរាប យក​ចេញពី​កន្លែងកើតហេតុ ទៅកាន់​អង្គភាព​របស់ខ្លួន​បាត់ទៅ​៕ 
​ 

   ​

 - See more at: http://www.cen.com.kh/localnews/details_more/22?token=N2ZjMDU5Mm#sthash.po877gs7.dpuf