យោធាចាប់ឡានដឹកឈើគ្រញូង របស់នគរបាលព្រំដែនគោក នៅតំបន់អូរស្វាយ

សៀមរាប:  រថយន្ត​ដឹកឈើ​គ្រញូង​ល្មើសច្បាប់ របស់​នគរបាល​ការពារ​ព្រំដែន​គោក បាន​ត្រូវ​កម្លាំងយោធា​កងពលតូច​ថ្មើ​ជើង​លេខ​៤១ សហការ​ជាមួយ​កម្លាំង​ប្រតិបត្តិកា​សឹក​រង ស្រុក​ត្រពាំង​ប្រាសាទ ស្ទាក់ចាប់ ខណៈ​ទាំងពីរ​នាក់​ប្តី​ប្រពន្ធ កំពុង​ដឹក​ចេញពី​ព្រំដែន​ថៃ​។​
​    ​
​ការស្ទាក់ចាប់​រថយន្ត​មួយគ្រឿង​នោះ ធ្វើឡើង​នៅ​ម៉ោង ៧ និង ៣០ នាទី ព្រឹក​ថ្ងៃទី​១៦ ខែកញ្ញា ឆ្នាំ​២០១៣ នៅ​ចំណុច​ភូមិ​៨៩ ឃុំ​ទំនប់​ដាច់ ស្រុក​ត្រពាំង​ប្រាសាទ ខេត្ត​ឧ​ត្ត​រ​មានជ័យ​។​
​    ​
​សមត្ថកិច្ច​ក្នុង​ហេតុការណ៍ បាន​ឲ្យ​ដឹងថា រថយន្ត ស៊ើប គ្មាន​ស្លាក​លេខ ជា​របស់​មន្ត្រីនគរបាល​ការពារ​ព្រំដែន​គោក​លេខ​៩០៥ ឈរជើង​នៅ​ចំណុច​អូរ​ស្វាយ ឈ្មោះ លួង ធន់​អ៊ី​ម​។ ឈើ​គ្រញូង​នេះ ត្រូវបាន​ប្តី​ប្រពន្ធ​បាន​ដឹក​ចេញពី​ព្រំដែន​ថៃ ឆ្លងកាត់​ច្រក​អូរ​ស្វាយ​ស្រុក​ត្រពាំង​ប្រាសាទ បំ​រ៉ុង​ឆ្ពោះទៅកាន់​ស្រុក​អន្លង់វែង ខេត្ត​ឧ​ត្ត​រ​មានជ័យ​។  

​ប្រភព​បន្តថា នៅពេល​កម្លាំង​ស្ទាក់ចាប់ ម្ចាស់​ឈើ​ពីរ​នាក់​ប្តី​ប្រពន្ធ បាន​រត់គេចខ្លួន បន្សល់​តែ​ឈើ​គ្រញូង និង​រថយន្ត​ប៉ុណ្ណោះ​។ ឈើ​គ្រញូង​មួយ​ឡាន​នោះ មាន​ចំនួន ១០​ដុំ មានមុខ​កាត់ ០,៤០ គុណ ០,៤០ ប្រវែង ០,៤០ ម៉ែត្រ បច្ចុប្បន្ន​រក្សាទុក នៅ​ទីបញ្ជាការ​សឹក​រង​ស្រុក​។​
​    ​
​ប្រភព​ដដែល​ឲ្យ​ដឹង​ទៀតថា ច្រក​អូរ​ស្វាយ ក្នុងភូមិ​សាស្ត្រ ស្រុក​ត្រពាំង​ប្រាសាទ គឺជា​ច្រក​ធំ​បំផុត នៅតាម​បន្ទាត់​ព្រំដែន​ខាងលិច ជាប់​ប្រទេស​ថៃ ហើយក៏​ជា​ច្រក​ក្តៅគគុក​មួយ​ផងដែរ ដែល​ជនកម្ពុជា ស្លាប់ រងរបួស និង​ចាប់ខ្លួន ដោយ​អាជ្ញាធរ​ថៃ​។ ហេតុការណ៍​ទាំងអស់នេះ គឺ​ដោយសា​តែ​ពួកគេ បាន​ឆ្លងដែន​ចូលទៅ​កាប់​ឈើ​គ្រញូង ក្នុង​ទឹកដី​ថៃ​ដោយ​ខុសច្បាប់​។​
​    ​
​ដោយឡែក ចំពោះ​មន្ត្រី​គ​របាល​ព្រំដែន​គោក ឈ្មោះ លួង ធន់​អ៊ី​ម នេះ​វិញ ប្រភព​បាន​បញ្ជាក់ថា ក្រៅពី​មិនបាន​ជួយ​ទប់ស្កាត់ ចំពោះ​ការចូលទៅ​កាប់​ឈើ​គ្រញូង​ក្នុង​ទឹកដី​ថៃ របស់​ជនកម្ពុជា រូបគេ​ថែមទាំង​ជា​អ្នកធ្វើ​ជំនួញ​ឈើ​គ្រញូង​ដ៏​ធំ​នៅក្នុង​តំបន់​នោះ​ទៀត​។ 

​មន្ត្រី​រូបនេះ រួមជាមួយ​ប្រពន្ធ ដោយ​សំអាង មាន​ស្បែក​ខ្លា​ពាក់ គឺ​បានធ្វើ​ជំនួញ​ឈើ​គ្រញូង​យូរ​ឆ្នាំ​មកហើយ​។​
​    ​
​គេ​មិនដឹងថា ថ្នាក់លើ អាច​បណ្តោយ​ឲ្យ​មន្ត្រី​រូបនេះ បន្តធ្វើ​ជំនួញ​ឈើ​គ្រញូង​ទៀត ឬ​យ៉ាងណាទេ ក្រោយ​ធ្លាយ​រឿង​បែបនេះ​៕ 

សមត្ថកិច្ចបង្ក្រាបជំនួញ​ឈើ​គ្រញូងនាពេលកន្លងមក (រូបថត ៖ ឯកសារ)​

 - See more at: http://www.cen.com.kh/localnews/details_more/22?token=ZjMwZjBiNm#sthash.vZKiVa1H.dpuf